أغلق الدكتور أحمد زكي تليفونه ...و كده رضا

في محاولة كثير من الصحفيين للاتصال بالدكتور أحمد زكي بدر " لمحاولة معرفة كم الاموال التي صرفت علي الحفلات " بعد تصريح مسئول بالجامعة لصحيفة المصري اليوم أنهم 150 الف جنيه بس " لا غير "
و بعد ظهور أمين الاتحاد " أحمد لطفي - تربية عين شمس " في مكالمة تليفزيونية لبرنامج يناقش هذه المهزلة ...و قال دا كلهم ما يعدوش 5 الاف جنيه ....مش عارفين بقي لإما مسئول الجامعة بيكذب " و دا راجل في موقع مسئول " لإما امين الاتحاد بيكذب " و دا طالب " .....
الغريبة بقي إن الدكتور أحمد زكي بيقول و ماله لما نفرفش ...و أحمد لطفي " أمين الجامعة " برده بيقول و ماله لما نفرفش ....و يبدو إن الاتنين قرروا يفرفشوا علي ألام الطلبة من زيادة المصاريف و ارتضوا التضحية بالطلبة و مستقبل الجامعة مقابل إنهم يفرفشوا ........و عشان ما حدش يزعجهم و هما بيفرفشوا عشان كده نعتقد إن الدكتور احمد زكي بدر أغلق تليفونه " مش خوفا من الصحفيين ذي ما بيقولوا "

في مشهد جميل بيبين الفرفشة اللي دكترو الجامعة و أمين الاتحاد وصلولها ..

من فيلم كده رضا ........نترككم مع المشهد

أكتب مطالب كليتك في التعليقات

حقي رابطة طلابية 100% بنحاول ندور علي حقوق الطلاب الضايعة و عشان كده حبينا نشارك الطلبة معانا في همومها و مطالبها ...عايزين نطالب بحقوق الطلاب ...بس يا تري ايه هي حقوق الطلاب دي ؟؟؟
صحيح أحنا عارفين بعضها بس أكيد في كل كلية حقوق ضايعة عن كليات أخري
ياريت يا شباب يكون ده بداية التغيير في كلياتنا ....أحنا كلنا طلاب بنخاف علي مصلحتنا ...ياريت كلنا نكتب هنا في التعليقات ايه المشاكل و المطالب اللي بنطالب بيها في كلياتنا و نكتب كلية ايه ...يلا اكتب كل حاجة تخطر علي ذهنك و لما تيجي حاجة كمان أبقي اكتبها ..أهم حاجة متكسلش و اكتب كل حاجة علي طول ....

حقي تشارك في مؤتمر القاهرة الدولي

صورة من البرشور الموزع في مؤتمر القاهرة

شاركت رابطة حقي الطلابية في مؤتمر القاهرة الدولي المنعقد في القاهرة بنقابة الصحفيين و قد كان الكثير من رواد المؤتمر سواء من طلاب الجامعات الاخري أو المشاركين مرحبين جدا برابطة حقي و معجبين بأن الطلاب ما زالوا بهذا الوعي ....و تقدم الكثير منهم بطلب إلي أعضاء رابطة حقي للمشاركة في أكثر من ندوة لشرح فكرتهم علي الجميع ....و عقد بعض الصحفيين لقاءات مع ممثلي الرابطة

ووزع طلاب الرابطة علي الحضور بورشورا لاقي إعجاب الجميع

ازاي تنضم لرابطة حقي و تبقي عضو فيها

لو عايز تبقي عضو في رابطة حقي الطلابية و نفسك تشترك معانا ....أبعت اسمك وكليتك و دفعتك علي ايميل المدونة haaee_blog@hotmail.com و لو أمكن رقم الموبايل عشان نتصل بيك و نديك كارنيه الرابطة .....

رابطة حقي " مش عايز غير حقي "

رئيس الجامعة ....و فيلم عايز حقي

حاول رئيس الجامعة التنصل من ما اشيع في الجرائد من هجمة شرسة ضده نتيجة بعده التام عن الواقع الطلابي و خصوصا بعد اختياره كأسوء رئيس جامعة مصرية و قال إن الحفلات بيعملها الاتحاد و هو اللي مسئول عنها ......طيب ما هو أنت اللي عينت طلاب الاتحاد " و ما عملتش انتخابات في الجامعة " يبقي تستاهل اللي يجي من تحت دماغهم ....و لا هما طلبة الاتحاد بيمشوا كلمتهم غصب عن رئيس الجامعة
نفهمها دي بقي ؟؟!!!!
يارئيس الجامعة أحنا اتمنعنا من اننا نقابلك ....معانا طلبة كتير عندهم مشاكل في التعليم ...خايفين ياريس علي الجامعة ... عايزين جامعتنا احسن جامعة ...معانا شباب و بنات عايزين يتعلموا بجد ياريس مش سلق بيض ....ياريس أوعي تسمع لطلبة الاتحاد و الامن دول بيدوك تقارير تقولك إن الطلبة معاها فلوس و الجامعة مية مية ...أنزل اسأل الطلبة و أنت تعرف يارئيس الطلبة حالهم عامل ازاي ..ياريس مرة واحدة تعملها قبل ما التاريخ يقول إنك فعلا اسوء رئيس جامعة

و نحب نهديك الكليب ده من فيلم عايز حقي
عشان أحنا طلبة عايزين حقوقنا

حكاية كليب التحرش الجنسي

قام أحد طلاب رابطة حقي و أثناء خروجه من الجامعة بعد الغاء عميد الكلية محاضرة لاعتراض الطلاب علي الحفلات ...بتصوير هذا المشهد الغير لائق بقدسية الحرم الجامعي ....و نظرا لأننا لم نكن نود نشره و تأخرنا كثيرا في ذلك فنحن نملك الفيديو منذ أكثر من 3 اسابيع و قلنا لعمداء الكليات إن الحفلات فيها تحرش جنسي و اهدار للمال العام ....فأستعجب البعض ول م يصدق لابعض

أما الدكتور أحمد زكي بدر فقد اتهمنا عبر الصحف بالظلاميين و الانقلابيين و مثيري الشائعات في الجامعة و هذا في جرايد الحكومة و بدأ يرسل للصحف بأن هذا لم يحدث و اللي عنده دليل يوريني ....

من هذا المنطلق اردنا ارسال رسالة مفادها أننا نملك الادلة و البراهين مش بنقول كلام زي ناس و السلام

مش بنروج لشائعات ذي ناس برده ..مش بنخدر الطلبة و نقول كلام و أحنا مش قده

فنشرنا الصورفقط فطلع علينا طلبة الاتحاد و قالوا ...دا مش في الجامعة دا منظر مفبركينه من أي حتة و مش دليل ....فكان لا بد من وضع النقاط علي الحروف فأخترنا اقل هذه المشاهد " و لا تظهر اي بنسبة معقولة وش البنت عشان ما تبقاش فضيحة و لو انها فضحت نفسها في الحفلة بما فيه الكفاية بس مالناش دعوة و نشرنا الفيديو ليضع كل من مسرفي الاموال و مصاصين فلوس الطلبة ايديهم علي افواههم فلا نسمع لهم صوتا ...طبعا رئيس الجامعة من ساعتها ما بيردش علي صحافة لأنه خايف يرد ...و أظن لو رد هنوريه باقي الفيديوهات و ازاي الجامعة في عهد سيادته اتحولت لكباريه ...و أسألوا الامن كام قضية اداب اتعملت في الحفلات دي و لا انتوا كنت قاعدين تتفرجوا و خلاص ؟؟؟"

أحتراما لرأي محبي رابطة حقي فأحنا هنشيل نشره عشان الذوق العام.

بس لو رئيس الجامعة أنكر أعتقد أن إننا في الحالة دي ممكن ننشر فيديوهات تانية بس ساعتها مش هتقدر تفتح عينك من كتر القرف

حقي ترفع بلاغ للنائب العام ضد رئيس الجامعة

تقدم أحد طلاب رابطة حقي ببلاغ إلي النائب العام ضد الدكتور أحمد زكي بدر لإهداره أموال الطلاب
في حفلات لا طائل منها في خدمة العملية التعليمية في حين تحتاج الجامعة إلي هذه الاموال لتطوير المعامل و الحمامات و الخدمات العامة
و قد حاولت جريدة البديل اثناء متابعة القضية الاتصال برئيس الجامعة لمعرفة اقواله تجاه هذا الموقف ...لكنه لا يرد علي تليفونات " معلش يمكن محرج "

رأي الطلبة في التطوير و زيادة المصاريف !!

ده رأي الطلبة في زيادة المصاريف

ما حدش شاف اي تطوير خالص

حرام عليكم الاتحاد صرف الفلوس علي نفسه

مطلوب اقالة أسوء رئيس جامعة

أضغط علي الصورة للتكبير

كتبت جريدة الدستور اليومي تحقيقا صحفيا عن الدكتور أحمد زكي بدر و الذي أختير اسوء رئيس جامعة مصرية في تاريخ جامعة عين شمس و قد وصف التحقيق الدكتور بأنه حول الجامعة غلي وزارة داخلية جديدة فقد قرب الدكتور منه الامن و استبعد الطلاب و الدكاترة و العمال ....و هو ما سبب كره الجميع له

و قد وصف التقرير أهدار الرئيس للمال العام للطلاب و ذكر ايضا احداث البلطجة في الجامعة التي تكررت في عهده

حزمي يا رئيس الجامعة في الدستور

اضغط لتكبير الصورة

نشرت جريدة الدستور الاسبوعية خبرا عن المجلة الساخرة التي قامت بتوزيعها رابطة حقي بالجامعة

و نقلت رد فعل الطلاب ايزاء اهدار المال العام

أعضاء هيئة التديس اعترضوا علي الحفلات مع الطلبة

نقلا عن جريدة المسائية ...الصفحة الاولي

شن أعضاء هيئة التدريس بجامعة عين شمس هجوما عنيفا ضد رئيس الجامعة اعتراضا علي تنظيم الحفلات الغنائية بصفة اسبوعية داخل الحرم الجامعي و تحويل الجامعة إلي كباريه نهاري و بؤر للتحرش بين الشباب الجامعي
و أكد أعضاء هيئة التدريس و الطلاب أن الجامعة قامت بزيادة المصاريف هذا العام بنسبة 400 %و يتم إهدار هذه الاموال علي الفنانين و فرقهم و الحفلات الصاخبة في الوقت الذي تحتاج فيه المعامل و المنشآت إلي هذه الاموال بالاضافة إلي عدم الم المقعدد كطبير من الطلاب علي سداد هذه الزيادات
و حصات المسائية علي شريط فيديو و مقتطفات لهذه الحفلات يظهر بها التحرش الجنسي بين الطلبة و الطالبات كما توضحه الصور مستغلين الزحام و الصخب

أشارت د/ هدي اباظة استاذة الادب أن اقامة الحفلات تتسبب في إغلاق ابواب الجامعة في الصباح الباكر و تعطل دخول و خروج السيارات و تضييع المحاضرات كما أن الصوت العالي للميكروفونات يشوش علي الطلبة
و قالت إن مصاعد كلية الاداب معطلة منذ أكثر من 10 سنوات و لم يفكر أحد في تصليحها من أموال هذه الحفلات

و أضاف د / أحمد دياب الاستاذ بالالسن و عضو مجلس الشعب أن ما يحدث داخل هذه الحفلات لا يوصف إلا بالمهازل و تساءل كيف تتحول القاعات غلي عروض للازياء الساخنة و ملاهي للتحرشات و الغناء و طالب بضرورة الكشف عن مصادر تمويل الحفلات لإلهاء الشباب عما يجري في البلد و تخديرهم عن الواقع

و أكد د/ طارق اسعد استاذ الطب النفسي بالجامعة أن الانشطة الطلابية مفيدة و مطلوبة لكن المرفوض اقامة الحفلات الصاخبة و اهدار قدسية الحرم الجامعي و استنكر توزيع دروع الجامعة العلمية علي المطربين و الراقصين بدلا من توزيعها علي الكفاءات العلمية

احمد زكي اسوء رئيس جامعة في استفاتاء عام بمؤتمر القاهرة الدولي

حصل الدكتور أحمد زكي بدر في استفتاء عام بمؤتمر القاهرة الدولي المنعقد منذ ايام علي لقب اسوء رئيس جامعة مصرية من بين 17 جامعة مصرية و هذا نتيجة لما تشهده الجامعة من تردي للأوضاع منذ أن تم تعينه رئيسا لها